Ijtimoiy himoya milliy agentligi loyihalari xalqaro mukofotga sazovor boʻldi
Ozarbayjonning Xonkandi shahrida oʻtkazilgan «SOCGOV 2026 – Aqlli boshqaruv uchun raqamli tahlil» xalqaro forumi doirasida «AI4DOST Social Award 2026» tanlovi gʻoliblarini taqdirlash marosimi boʻlib oʻtdi.
Ijtimoiy himoya milliy agentligi loyihalari «AI4DOST Social Award 2026» mukofotiga sazovor boʻldi: «INSON» markazlari gʻolib deb topildi, yana uchta loyiha finalistlar qatoriga kirdi.
Ozarbayjonning Xonkandi shahrida oʻtkazilgan «SOCGOV 2026 – Aqlli boshqaruv uchun raqamli tahlil» xalqaro forumi doirasida «AI4DOST Social Award 2026» tanlovi gʻoliblarini taqdirlash marosimi boʻlib oʻtdi. Turli davlatlardan taqdim etilgan 84 ta loyihadan 20 tasi finalga chiqdi, 7 tasi gʻolib deb topildi.
«Mintaqaviy ijtimoiy tashabbus» nominatsiyasi gʻolibi:
«INSON markazlari va mahalladagi ijtimoiy xodimlar tizimi: mahalla bilan integratsiyalashgan smart tizim». Bugungi kunda «INSON» tizimi Oʻzbekistonning barcha hududlarida faoliyat yuritmoqda: 208 ta markaz 100 dan ortiq xizmat koʻrsatadi, ularning 80 foizdan ortigʻi raqamlashtirilgan.
Yana uchta loyiha finalist sertifikatlari bilan taqdirlandi:
«IMKON: Har bir bolaga eshiklarni ochamiz» («Mintaqaviy ijtimoiy tashabbus» nominatsiyasi); «Yordamchi texnologiyalar uchun smart-vaucher ekotizimi» («Ijtimoiy sohada sunʼiy intellektga asoslangan raqamli yechimlar» nominatsiyasi); «Toʻsiqsiz kasblar» — Agentlik huzuridagi Xalqaro inklyuziv hub loyihasi («Mintaqaviy ijtimoiy tashabbus» nominatsiyasi).
