Toshkentdagi xonadonda yuz bergan yongʻinda bir kishining jasadi topildi
Uchtepa tumani Yusuf Sakkokiy koʻchasidagi uylarda yongʻin sodir boʻldi. Hozirda holat yuzasidan tegishli organlar tomonidan jinoyat ishi qoʻzgʻatilgan.
Toshkentdagi xonadonlarning birida tunda sodir boʻlgan yongʻinda bir kishi halok boʻldi. Bu haqda poytaxt Favqulodda vaziyatlar boshqarmasi xabar qildi.
Maʼlumotga koʻra, 24 oktabr kuni soat 01:33 da Uchtepa tumani Yusuf Sakkokiy koʻchasida joylashgan turar joy majmuasidagi xonadonlardan birida yongʻin chiqqan.
Yongʻin-qutqaruv ekipajlari voqea joyiga yetib borib, olovni soat 01:52 da bartaraf etgan. Hodisa oqibatida xonadondagi uy jihozlari zarar koʻrgan. Yongʻin oʻchirilgandan soʻng voqea joyida bir nafar fuqaroning jasadi topilgan.
Hozirda holat yuzasidan tegishli organlar tomonidan jinoyat ishi qoʻzgʻatilgan. Yongʻin sabablari va boshqa tafsilotlarni aniqlash boʻyicha tergovga qadar surishtiruv ishlari olib borilmoqda.
