Toshkentdagi oʻnlab bozor va savdo komplekslari ommaviy savdolarga chiqariladi
Bozor va savdo komplekslarining moliyaviy holati, mol-mulki va kadastr hujjatlari oʻrganiladi.
Shuningdek, noqonuniy qurilishlar, soliq va boshqa majburiy toʻlovlar boʻyicha qarzdorliklar aniqlanadi.
Toshkent shahridagi bozorlar va savdo komplekslarining moliyaviy holati oʻrganilib, ularning barcha mol-mulki toʻliq xatlovdan oʻtkaziladi. Bu ishlar poytaxtni 2026–2027 yillarda ijtimoiy-iqtisodiy rivojlantirishga qaratilgan qoʻshimcha chora-tadbirlar doirasida amalga oshiriladi.
Toshkent shahar hokimligiga koʻra, xatlov jarayonida bozor va savdo majmualariga tegishli bino-inshootlarning kadastr hujjatlari, mulkdorlar roʻyxati hamda moliyaviy koʻrsatkichlari atroflicha tahlil qilinadi. Shuningdek, hududlardagi noqonuniy qurilishlar aniqlanib, ularni bartaraf etish choralari koʻriladi. Bozorlarning hududiy chegaralari va muhofaza zonalari ham qayta koʻrib chiqiladi. Bundan tashqari, ularning soliqlar va boshqa majburiy toʻlovlar boʻyicha qarzdorligiga ham alohida eʼtibor qaratiladi.
Oʻrganishlar yakunida bozorlar va savdo komplekslariga tegishli aktivlardan samarali foydalanish, ularning iqtisodiy salohiyatini oshirish hamda tegishli boshqaruv organlari qarorlari asosida ommaviy savdolarga chiqarish boʻyicha takliflar ishlab chiqiladi.
Mazkur jarayonda Kadastr agentligining Toshkent shahar boshqarmasi, tuman hokimliklari, soliq organlari, Munitsipal aktivlarni boshqarish markazi va "Tashkent Invest" aksiyadorlik jamiyati hamkorlikda ish olib boradi.
Eslatib oʻtamiz, 2026 yil 27 iyul kuni Toshkent shahrini 2026–2027 yillarda ijtimoiy-iqtisodiy rivojlantirish boʻyicha qoʻshimcha chora-tadbirlar toʻgʻrisidagi Prezident qarori imzolangan edi. Hujjatga muvofiq, poytaxtdagi 35 ta bozor va savdo kompleksi hamda ularning shoxobchalarini ommaviy savdolarga chiqarish belgilangan.
Xususiylashtirish rejasiga Sergeli avtomobil bozori, "Oʻrikzor" va "Qoʻyliq" kabi yirik savdo maskanlari ham kiritilgan.
