Toshkentda noqonuniy qurilgan koʻp qavatli uylar soni oshkor qilindi
Qurilish vaziri Qonunchilik palatasida oʻtgan yigʻilishda umumiy noqonuniy qurilish obʼektlari sonini koʻp qavatli uylar soni sifatida keltirib yuborgan. Vazir ushbu xatolik uchun uzr soʻradi.
Qurilish va uy-joy kommunal xoʻjaligi vazirligi Toshkentdagi noqonuniy qurilishlar soniga oid maʼlumotni aniqlashtirdi.
Rasmiy tushuntirishga koʻra, poytaxtda 320 dan ortiq noqonuniy qurilish obʼekti aniqlangan. Bu koʻrsatkichga yakka tartibdagi xonadonlar, doʻkonlar, kiosklar, pavilonlar va boshqa inshootlar ham kiradi.
Noqonuniy qurilgan koʻp qavatli uylar soni esa 61 tani tashkil etadi.
Qurilish va uy-joy kommunal xoʻjaligi vaziri Oliy Majlis Qonunchilik palatasida oʻtgan yigʻilishda avvalgi javobda umumiy qurilish obʼektlari sonini koʻp qavatli uylar soni sifatida keltirib yuborgan. Vazir ushbu xatolik uchun uzr soʻragan.
