"Bolalar oldidagi masʼuliyatimiz ertaga emas, aynan bugundan boshlanadi” – Shahnoza Mirziyoyeva

Samarqandda “Bolalar farovonligiga investitsiya: kelajak avlodlarning barqaror va adolatli taraqqiyoti sari yoʻl” butunjahon sammiti davom etmoqda.

Unda turli mamlakatlarning birinchi xonimlari, BMT, UNICEF, Jahon banki, Jahon sogʻliqni saqlash tashkiloti va boshqa xalqaro tuzilmalarning yuqori martabali vakillari ishtirok etyapti.

Tadbirda soʻzga chiqqan Ijtimoiy himoya agentligi rahbari birinchi oʻrinbosari Shahnoza Mirziyoyeva bolalar farovonligi, ularning salomatligi va xavfsizligini taʼminlash har bir mamlakatning muhim vazifasi ekanini taʼkidladi.

“Bolalar – bizning kelajagimiz”, degan gapni koʻp takrorlaymiz. Ammo oʻzim ona boʻlganimdan keyin bu iboraning maʼnosini yanada teranroq anglay boshladim. Chunki ota-ona uchun farzand shunchaki kelajak emas. Farzand – bugungi kunimiz”, deydi u.

Shahnoza Mirziyoyeva bolalarni himoya qilish, avvalo, ularning yonida yordam beradigan va xavfsizligini taʼminlaydigan inson boʻlishidan boshlanishini qayd etgan.

Raqamli olamning kengayishi, dunyodagi beqarorlik va ziddiyatlar bolalar hamda oilalar xavfsizligiga taʼsir koʻrsatmoqda. Bu muammolarni hal etish uchun hukumatlar, biznes vakillari, fuqarolik jamiyati va xalqaro tashkilotlar hamkorligini kuchaytirish zarur.

“Birgalikda zoʻravonlikka nisbatan mutlaqo murosasizlik va har bir bolaga soʻzsiz hurmat tamoyillariga asoslangan yangi madaniyatni shakllantirishimiz mumkin. Bugun bolalarimizning baxti, salomatligi va xavfsizligi bizning qoʻlimizda. Shuning uchun bolalar oldidagi masʼuliyatimiz ertaga emas, aynan bugundan boshlanadi”, deydi Shahnoza Mirziyoyeva.