Samarqandda YPX xodimining qonuniy talabiga boʻysunmay, uni haqorat qilgan oʻquvchilar ushlandi
Oʻquvchilar ijaraga olingan Malibu-2 avtomobilida Ishtixon tumani koʻchalarida harakatlanib, YPX xodimining toʻxtash talabiga boʻysunmagan. Xodimni haqorat qilib, uni obroʻsizlantiruvchi videotasvirlarni ijtimoiy tarmoqlarga joylashtirgan.
Samarqand viloyatining Ishtixon tumanida YPX xodimining qonuniy talabiga boʻysunmay, uni haqorat qilgan texnikum oʻquvchilari aniqlandi. Bu haqda viloyat YHXB xabar berdi.
Texnikum oʻquvchilari ijaraga olingan Malibu-2 avtomobilida Ishtixon tumani koʻchalarida harakatlanib, YPX xodimining toʻxtash talabiga boʻysunmagan. Shuningdek, ular xodimni haqorat qilib, uni obroʻsizlantiruvchi videotasvirlarni ijtimoiy tarmoqlarga joylashtirgan.
YHXB eʼlon qilgan videoda oʻquvchilardan biri avtomobilni 1,2 mln soʻmga ijaraga olganini va YPX xodimining toʻxtash talabiga boʻysunmaganini aytgan.
Yana bir oʻquvchi esa YPX xodimlarining toʻxtash talabiga boʻysunmay, qochib ketganini va ularni haqorat qilganini bildirgan.
Oʻrganishlar davomida qoidabuzarliklarni sodir etgan shaxslar Kattaqoʻrgʻon tumanidagi 2-sonli texnikum oʻquvchilari ekani aniqlangan.
Shundan soʻng holat oʻquvchilar tahsil olayotgan taʼlim muassasasida tanqidiy muhokama qilingan.
Holat yuzasidan Ishtixon tumani ichki ishlar boʻlimi tomonidan tegishli hujjatlar rasmiylashtirilgan. Toʻplangan materiallar qonuniy qaror qabul qilish uchun prokuratura organlariga yuborildi.
