Surxondaryoda ayiq va uchta yovvoyi toʻngʻizni ovlaganlar ushlandi
Hayvonot dunyosiga jami 679 mln 800 ming soʻm moddiy zarar yetkazilgan. Huquqbuzarlarga nisbatan Jinoyat kodeksining 202-moddasi 3-qismi bilan jinoyat ishi qoʻzgʻatildi.
Samarqand va Surxondaryo viloyatlari Ekologiya va iqlim oʻzgarishi bosh boshqarmalari xodimlari hamkorligida navbatdagi reyd tadbiri oʻtkazildi.
Reyd davomida oq rangli “Niva Legend” rusumli avtomashina toʻxtatilib, koʻzdan kechirilganida ustki yukxonasida 8 ta qopda 1 dona ayiq va 3 dona yovvoyi choʻchqaning tana boʻlaklari topilgan.
Shuningdek, avtomashinada 3 dona soyli stvolli ov quroli, MS-2112 rusumli silliq stvolli ov miltigʻi, Monza rusumli oʻqlangan, oʻqdonida 7,62 kalibrli 4 dona oʻq boʻlgan soyli stvolli ov quroli, 43 dona 7,62 kalibrli jangovar oʻq-dori, 56 dona mayda sochmali oʻq, 13 dona yakka jangovar oʻq, 2 dona binokl, 2 dona ovoz pasaytiruvchi moslama (glushitel), pichoqlar, fonarlar, bolta va boshqa buyumlar aniqlangan.
Reyd davomida huquqbuzarlar tomonidan Surxondaryo viloyati Sariosiyo tumani hududida Qizil kitobga kiritilgan 1 dona Tyan-Shan qoʻngʻir ayigʻi va 3 dona yovvoyi toʻngʻiz noqonuniy ovlanganligi maʼlum boʻldi. Natijada hayvonot dunyosiga 679 mln 800 ming soʻm moddiy zarar yetkazilgan.
Holat yuzasidan ov qurollari, oʻq-dorilar, ruxsatnomalar va ovchilik guvohnomalari vaqtincha saqlash uchun Samarqand viloyati IIBga topshirildi, transport vositasi jarima maydonchasiga joylashtirildi. Shuningdek, huquqbuzarlarga nisbatan Jinoyat kodeksining 202-moddasi 3-qismi bilan jinoyat ishi qoʻzgʻatildi.
