Peshlavhani reklamaga tenglashtirish toʻxtatildi
Oʻzbekistonda tadbirkorlar oʻzlari egallab turgan bino peshtoqiga korxona nomi va faoliyat turini yozish uchun reklama joyi pasportini rasmiylashtirishi shart emas. Hukumat qarori bilan bunday peshlavhalar tashqi reklama hisoblanmaydigan boʻldi.
Toshkent shahrida koʻplab tadbirkorlarda norozilik uygʻotgan peshlavha muammosi bartaraf qilindi. Bu haqda Raqobat qoʻmitasi xabar qildi.
Oʻzbekiston Respublikasi Vazirlar Mahkamasining 2026 yil 13 oktabrdagi 563-son qarori bilan tashqi reklamani joylashtirish, reklama joyi pasportini rasmiylashtirish va reklama konstruksiyalarini demontaj qilish tartiblariga oʻzgartirishlar kiritildi.
Yangi tartibga koʻra, tadbirkorlar uchun bir qator yengilliklar joriy etildi.
1. Doʻkon va ofis peshlavhalari uchun reklama pasporti talab qilinmaydi
Tadbirkorlik subʼekti oʻzi foydalanayotgan bino yoki inshootning tashqi tomonida, kirish qismida joylashtirgan nomi va faoliyat turi haqidagi axborot tashqi reklama hisoblanmaydi.
Bu qoida firma nomi, tovar belgisi va xizmat koʻrsatish belgisiga ham taalluqli. Bunday axborot uchun reklama joyi pasportini rasmiylashtirish talab etilmaydi.
2. Avtomobillarga reklama joylashtirish soddalashtirildi
Yuridik shaxslar oʻzlariga mulk huquqi yoki boshqa ashyoviy huquq asosida tegishli boʻlgan avtomobillarga oʻz tovar belgisi, faoliyat turi, ishlab chiqaradigan mahsulotlari yoki koʻrsatadigan xizmatlari haqidagi maʼlumotlarni soddalashtirilgan tartibda joylashtirishi mumkin.
Buning uchun Yagona interaktiv davlat xizmatlari portali (YIDXP) orqali elektron shaklda xabarnoma yuboriladi.
Xabarnoma qabul qilingach, reklama joyining pasporti avtomatik ravishda shakllantiriladi. Buning uchun yigʻim undirilmaydi.
Agar xabarnomada notoʻgʻri maʼlumotlar yoki boshqa shaxslarga tegishli tovar belgilari aniqlansa, reklama joyi pasporti bekor qilinadi. Bu haqda yuridik shaxsga asoslantirilgan xat yuboriladi.
3. Reklama pasportini onlayn bekor qilish mumkin
Tadbirkor reklama joyi pasportidan ixtiyoriy ravishda voz kechmoqchi boʻlsa, YIDXP orqali ariza yuborishi mumkin. Tegishli maʼlumotlar soliq organlariga avtomatik ravishda yetkaziladi.
4. Vaqtinchalik reklama uchun muddatlar belgilandi
Qarorga muvofiq, ayrim vaqtinchalik reklama obʼektlari uchun aniq muddatlar belgilangan:
Qurilish obʼektlaridagi reklama — qurilish ishlari tugaguniga qadar joylashtirilishi mumkin.
Bayramlar va tadbirlar uchun reklama — 30 kungacha joylashtirilishi mumkin.
5. «Dizayn-kod»ni oʻzgartirish tartibi belgilandi
Hududlarning tashqi koʻrinishi va reklama joylashtirilishiga oid dizayn-kod boʻyicha qarorlar jamoatchilik muhokamasidan, jumladan, regulation.gov.uz portali orqali muhokamadan oʻtkazilgandan keyin qabul qilinadi.
Qarorlar eʼlon qilinganidan uch oy oʻtgach kuchga kiradi. Bunda roʻyxatdan oʻtkazilgan tovar belgilaridan foydalanish imkoniyati saqlanishi shart.
Shuningdek, Toshkent shahrining dizayn-kodi 10 dekabrgacha tadbirkorlar va ommaviy axborot vositalari vakillari ishtirokida muhokama qilinishi belgilangan.
6. Reklama konstruksiyalarini demontaj qilish tartibi aniq belgilandi
Majburiy demontaj jarayoni quyidagi tartibda amalga oshiriladi:
Ikki kun oldin ogohlantirish: demontajning sanasi va vaqti haqida veb-saytda eʼlon beriladi, obʼekt egasiga esa yozma xabar yuboriladi.
Belgilangan ish vaqti: demontaj faqat ish kunlari soat 09:00 dan 18:00 gacha amalga oshiriladi.
Dalolatnoma tuzish: demontaj vaqtida obʼekt egasi ishtirokida dalolatnoma rasmiylashtiriladi. Unda sana, vaqt, demontaj sababi, fotosuratlar va konstruksiya saqlashga yuborilgan manzil koʻrsatiladi.
Yozma xabardor qilish: tadbirkorga tegishli qaror va xabarnomalar uning yuridik manziliga ham yozma ravishda yuboriladi.
7. Tashqi reklama ustidan jamoatchilik nazorati kuchaytiriladi
Tashqi reklama obʼektlarining joylashtirilishi ustidan jamoatchilik nazorati «Xalq nazorati» elektron portali orqali amalga oshiriladi.
