Tilanchilik bilan shugʻullanganlik uchun jarima oshirildi
Jamoat joylarida tilanchilik qilganlik uchun jarima bazaviy hisoblash miqdorining (BHM) 1–3 baravaridan 3–5 baravarigacha oshirildi.
Oʻzbekistonda tilanchilik bilan shugʻullanganlik uchun maʼmuriy javobgarlik kuchaytirildi.
Bu 14 oktabrda qabul qilingan OʻRQ–1180-sonli qonunda nazarda tutilgan. Ushbu qonun 14 oktabr prezident Shavkat Mirziyoyev tomonidan imzolandi.
Unga koʻra, Maʼmuriy javobgarlik toʻgʻrisidagi kodeksning 188³-moddasiga oʻzgartirish kiritilib, jamoat joylarida tilanchilik qilganlik uchun jarima bazaviy hisoblash miqdorining (BHM) 1–3 baravaridan 3–5 baravarigacha oshirildi. Shuningdek, 15 sutkagacha maʼmuriy qamoqqa olish jazosi ham belgilandi.
Moddaning ikkinchi qismida nazarda tutilgan huquqbuzarlik uchun esa BHMning 10–15 baravari miqdorida jarima yoki 15 sutkagacha maʼmuriy qamoq jazosi qoʻllaniladi.
Yangi tartib bolalarni zoʻravonlikning barcha shakllaridan himoya qilish tizimini takomillashtirishga qaratilgan qonun doirasida joriy etilmoqda. Eslatib oʻtamiz, ilk bor tilanchilik uchun maʼmuriy va jinoiy javobgarlik 2019 yil boshida kiritilgandi.
