Shavkat Umrzoqov pul ajratish boʻyicha qaror imzoladi
“Toshkentning faol ayoli – 2026” sport musobaqasi hamda “Zakovat” intellektual oʻyinining Toshkent shahar bosqichlarini oʻtkazish xarajatlari uchun 140 mln soʻm sarflanadi. Shuningdek, xizmat avtomobillarining ayrim xarajatlari uchun ham mablagʻ beriladi.
Toshkent shahar mahalliy byudjetining zaxira jamgʻarmasi hisobidan jami 180 mln soʻm ajratildi. Bu haqda hokim Shavkat Umrzoqovning tegishli qarori eʼlon qilindi.
Mablagʻ Toshkent shahar Oila va xotin-qizlar boshqarmasining tuman boʻlimlari rahbarlariga biriktirilgan xizmat avtomobillarining ayrim xarajatlari uchun yoʻnaltiriladi.
Qarorda yoqilgʻi xarajatlari uchun 130 mln hamda mazkur avtomobillarni saqlash bilan bogʻliq xarajatlar uchun 50 mln soʻm ajratilgan.
Shuningdek, “Toshkentning faol ayoli – 2026” sport musobaqasi hamda “Zakovat” intellektual oʻyinining Toshkent shahar bosqichlarini oʻtkazish xarajatlari uchun yana 140 mln sarflanishi belgilangan.
Hujjatga koʻra, mazkur qarorning ijrosini nazorat qilish Umrzoqovning moliya-iqtisodiyot va kambagʻallikni qisqartirish masalalari boʻyicha birinchi oʻrinbosari D.Xudaybergenov zimmasiga yuklatilgan.
