Qozogʻiston xorijliklar uchun elektron kirish ruxsatnomasi joriy etadi
Bu Oʻzbekiston fuqarolari uchun ham amal qiladi. Ruxsatnoma 2027 yil iyuldan majburiy boʻladi.
Qozogʻiston hukumati vizasiz rejimdagi xorijliklar, jumladan Oʻzbekiston fuqarolari uchun elektron kirish ruxsatnomasi — ETA olish qoidalarini tasdiqladi.
Ruxsatnoma bepul rasmiylashtiriladi va 2027 yil 1 iyuldan majburiy boʻladi.
Ariza QazETA platformasi orqali rejalashtirilgan safardan kamida 72 soat oldin topshirilishi kerak. Ruxsatnoma 180 kun amal qiladi va shu davrda bir necha marta kirib-chiqish imkonini beradi.
Tizim bosqichma-bosqich joriy etiladi:
- 2026 yil 1 noyabr — Aqtau aeroporti va toʻrtta avtomobil oʻtkazish punktida;
- 2027 yil 1 yanvar — Ostona va Olmaota aeroportlarida;
2027 yil 1 mart — qolgan barcha oʻtkazish punktlarida.
2027 yil 1 iyulgacha ETA yoʻqligi mamlakatga kirishni rad etish uchun asos boʻlmaydi.
Istisno holatlar 16 yoshga toʻlmagan bolalar, 65 yoshdan oshgan shaxslar, Qozogʻiston vizasi yoki yashash ruxsatnomasiga ega shaxslar hamda aeroport tranzit hududidan chiqmaydigan yoʻlovchilar uchun amal qiladi.
