Novosibirskda ogʻir ahvolga tushgan oila Oʻzbekistonga qaytarildi
Ota-ona Rossiya migratsiya qonunchiligi talablarini buzgani sababli ularning 6 yoshli oʻgʻli va 12 yoshli qizi Novosibirskdagi ikkita reabilitatsiya markaziga joylashtirilgan.
Rossiyaning Novosibirsk shahrida reabilitatsiya markazlariga vaqtincha vasiylikka olingan ikki nafar oʻzbekistonlik bola ota-onasiga topshirildi. Bu haqda "Dunyo" axborot agentligi xabar berdi.
Maʼlum qilinishicha, ota-ona Rossiya migratsiya qonunchiligi talablarini buzgani sababli ularning 6 yoshli oʻgʻli va 12 yoshli qizi Novosibirsk shahridagi ikkita reabilitatsiya markaziga joylashtirilgan.
Oʻzbekistonning Novosibirsk shahridagi Bosh konsulxonasi diplomatlari bolalarni oilasiga qaytarish uchun zarur hujjatlarni, jumladan, vatanga qaytish guvohnomalarini qisqa muddatda rasmiylashtirgan. Shuningdek, Xorijiy fuqarolarni vaqtincha saqlash markazi va reabilitatsiya markazlari rahbariyati bilan muzokaralar oʻtkazilgan.
Koʻrilgan choralar natijasida bolalar diplomatlar hamrohligida Novosibirsk xalqaro aeroportiga olib kelinib, ota-onasiga topshirilgan.
Oila 13 oktabr kuni "Novosibirsk — Fargʻona" yoʻnalishi boʻyicha Oʻzbekistonga qaytarilgan.
