Marko Rubio 17-22 oktabr kunlari Oʻzbekiston va Hindistonga tashrif buyuradi
Savdo-iqtisodiy hamkorlikni kengaytirish istiqbollarini muhokama qilish uchun Oʻzbekistonga AQShning yirik kompaniyalaridan 200 dan ortiq vakillar keladi.
AQSh Davlat kotibi Marko Rubio 17-22 oktabr kunlari Oʻzbekiston va Hindistonga tashrif buyurib, u yerda qator ikki tomonlama va koʻp tomonlama uchrashuvlar oʻtkazadi.
Bu haqda AQSh Davlat departamentining 13 oktabr kuni eʼlon qilingan bayonotida soʻz boradi.
Samarqandda Rubio AQSh va Markaziy Osiyoning beshta davlati — Qozogʻiston, Qirgʻiziston, Tojikiston, Turkmaniston va Oʻzbekistonni birlashtirgan "C5+1" formatidagi tashqi ishlar vazirlari uchrashuvida ishtirok etadi.
Ishtirokchilar AQSh va Markaziy Osiyo mamlakatlarida tinchlikni mustahkamlash hamda farovonlikni taʼminlashga qaratilgan strategik hamkorlikni rivojlantirish masalalarini muhokama qiladilar.
Davlat kotibi, shuningdek, mintaqa davlatlari vakillari bilan ikki tomonlama uchrashuvlar oʻtkazadi. Bundan tashqari, savdo-iqtisodiy hamkorlikni kengaytirish istiqbollarini muhokama qilish uchun Oʻzbekistonga AQShning yirik kompaniyalaridan 200 dan ortiq vakillar keladi.
Nobel Systems kompaniyasining maʼlum qilishicha, prezident va bosh direktor Maykl Samuel 2026 yil 19 oktabr kuni Samarqand shahrida boʻlib oʻtadigan biznes dasturida ishtirok etish uchun AQShning Oʻzbekistonga yuqori darajadagi biznes delegatsiyasi tarkibiga kiritildi.
Tashkilotchilar savdo, investitsiyalar va mintaqaviy iqtisodiy rivojlanish masalalari boʻyicha yuqori martabali davlat amaldorlari va biznes yetakchilari bilan muloqot qilish uchun AQSh va Markaziy Osiyoning 100 dan ortiq yirik kompaniyalari ishtirok etishini kutishmoqda.
Maykl Samuelning ushbu tarkibga tanlab olinishi Nobel Systems kompaniyasi va uning kengayib borayotgan xalqaro miqyosdagi mavqei uchun muhim qadam hisoblanadi.
