Gulistonda uyini narkolaboratoriyaga aylantirganlar ushlandi
2003 va 2005 yillarda tugʻilgan 3 nafar mahalliy fuqaro koʻp qavatli uylardan biridagi xonadonda kuchli taʼsir qiluvchi moddalarga qayta ishlov berib, sotish bilan shugʻullanishgan.
Davlat xavfsizlik xizmatining Sirdaryo viloyati boʻyicha boshqarmasi hamda viloyat Ichki ishlar boshqarmasi xodimlari tomonidan tezkor-qidiruv tadbirlari oʻtkazildi.
Natijada Guliston shahrida tashkil etilgan narkolaboratoriya fosh qilindi.
Xususan, 2003 va 2005 yillarda tugʻilgan 3 nafar mahalliy fuqaro koʻp qavatli uylardan biridagi xonadonda kuchli taʼsir qiluvchi moddalarga qayta ishlov berib, sotish bilan shugʻullanishgan.
Xolislar ishtirokida ushbu manzildan 5 kg 863 gr “Pregabalin” kuchli taʼsir qiluvchi moddasi, 100 ming dona boʻsh kapsulalar, 2 dona elektron torozi, tibbiy qoʻlqoplar va boshqa buyumlar ashyoviy dalil sifatida olindi.
Hozirda qonunbuzarlarga nisbatan Jinoyat Kodeksining 2761-moddasi 2-qismi “b” bandi bilan jinoyat ishi qoʻzgʻatilib, “qamoq” ehtiyot chorasi qoʻllanildi.
Tergov harakatlari olib borilmoqda.
