Dehqonobodda bir kishi selda oqib halok boʻldi
Maʼlumotlarga koʻra, yoʻldan adashgan Damas avtomobil haydovchisi va uning hamrohi yoʻnalishni aniqlash maqsadida sel oqimi oʻtadigan hududda toʻxtagan.
Dehqonobodda sel sabab bir kishi halok boʻldi.
2026 yil 13 oktabr kuni soat 17:30 larda Dehqonobod tumanining togʻli hududlarida kuzatilgan qisqa muddatli kuchli yomgʻir yogʻishi natijasida «Qoʻngʻirot» MFY Shakarbuloq qishlogʻi hududidan sel-suvlari oqimi oʻtgan.
Maʼlumotlarga koʻra, yoʻldan adashgan Damas avtomobil haydovchisi va uning hamrohi yoʻnalishni aniqlash maqsadida sel oqimi oʻtadigan hududda toʻxtagan. Avtomobil sirpanib, sel yoʻlining chuqurroq qismiga tushgan.
Shundan soʻng haydovchi transport vositasidan tushib, telefon orqali bogʻlanishga uringan va hamrohini sel kelayotgani haqida ogohlantirgan.
Biroq sel oqimi natijasida Damas avtomobil va uning ichidagi yoʻlovchini oqim olib ketgan. Olib borilgan qidiruv-qutqaruv ishlari davomida yoʻlovchi fuqaroning jasadi topilgan.
Hodisa joyiga tuman hokimligi, FVB va IIB masʼullari jalb etilgan.
