Oʻzbekistonda 3,4 mln tonna paxta terib olindi
Bu joriy yil uchun belgilangan 4,5 mln tonnali shartnomaviy koʻrsatkichning 76 foizini tashkil etadi. Yigʻib olingan hosilning 2,6 mln tonnasi paxta terish mashinalarida terilgan.
Oʻzbekistonda ushbu mavsum boshidan beri 3,4 mln tonna paxta terib olindi. Bu haqda Qishloq xoʻjaligi vazirligi xabar berdi.
12 oktabr holatiga koʻra, Oʻzbekistonda 3,4 mln tonna paxta xomashyosi yigʻib olindi. Bu joriy yil uchun belgilangan 4,5 mln tonnali shartnomaviy koʻrsatkichning 76 foizini tashkil etadi.
Yigʻib olingan hosilning 2,6 mln tonnasi paxta terish mashinalari, 848 ming tonnasi esa qoʻl mehnati yordamida terilgan. Yaʼni umumiy terimning qariyb 75 foizi mexanizatsiyalashgan.
Qoʻlda terilgan paxtaning 174 ming tonnasi dalalarni texnika uchun tayyorlash jarayonida, 674 ming tonnasi esa mashinalar kira olmaydigan kichik maydonlarda yigʻib olingan.
Bu yilgi terimga 3 mingga yaqin paxta terish mashinasi jalb qilingan. Ularning mingdan ortigʻi joriy yilda fermerlar va agroklasterlarga lizing asosida yetkazib berilgan.
Rasmiy maʼlumotlarga koʻra, 12 oktabrning oʻzida mashinalar yordamida 147 ming tonna paxta terilgan. Bu har bir mashinaga oʻrtacha 50 tonnadan toʻgʻri keladi.
