Ar-Riyod aeroportiga hujumda ikki oʻzbekistonlik jarohat oldi
Hodisa vaqtida aeroport hududida boʻlgan yana 20 ga yaqin Oʻzbekiston fuqarosi jabrlanmagan.
10 oktabr kuni Ar-Riyod xalqaro aeroporti 3-terminaliga ballistik raketa hujumi oqibatida Oʻzbekistonning ikki fuqarosi yengil jarohat oldi.
Bu haqda Oʻzbekiston TIV matbuot kotibi Omonulla Fayziyev maʼlum qildi.
1977 va 1997 yillarda tugʻilgan fuqarolarga birinchi tibbiy yordam koʻrsatilib, soʻng Diriyah Hospital shifoxonasiga yetkazilgan. Tibbiy tekshiruv va zarur muolajalardan soʻng ikkala bemor ham shifoxonadan javob berilgan.
Dastlabki maʼlumotlarga koʻra, hodisa vaqtida aeroport hududida boʻlgan yana 20 ga yaqin Oʻzbekiston fuqarosi jabrlanmagan.
"Oʻzbekistonning Ar-Riyoddagi elchixonasi Saudiya Arabistonining tegishli organlari bilan birgalikda vaziyat rivojini kuzatishda davom etmoqda, fuqarolarimiz bilan doimiy aloqada boʻlib, ularga zarur konsullik-huquqiy yordam koʻrsatmoqda", — dedi Omonulla Fayziyev.
Eslatib oʻtamiz, 10 oktabr kuni Saudiya Arabistonining Ar-Riyod xalqaro aeroportiga yirik hujum qilindi.
Dastlabki xabarlarga koʻra 12 kishi halok boʻlgan, 300 dan ortiq odam jarohatlangan.
Oʻzbekiston Tashqi ishlar vazirligi hujumni qatʼiy qoralab, tomonlarni vazminlikka va keskinlikni kuchaytirmaslikka chaqirdi.
