Turkiyada 15 yoshgacha boʻlgan bolalar uchun ijtimoiy tarmoqlar taqiqlanmoqda
15–17 yoshdagi oʻsmirlar uchun esa alohida xavfsizlik va maxfiylik qoidalari joriy etiladi. Pullik tranzaksiyalar ota-ona nazorati ostida boʻladi va xarajatlar chegaralari belgilanadi.
Turkiyada ijtimoiy media platformalariga 2026 yil 1 noyabrdan boshlab 15 yoshgacha boʻlgan bolalarga xizmat koʻrsatish taqiqlanadi.
LOG nashri xabar berishicha, tegishli qoida 10 oktabr kuni rasmiy Resmi Gazete gazetasida eʼlon qilingan. 15–17 yoshdagi oʻsmirlar uchun alohida xavfsizlik va maxfiylik qoidalari joriy etiladi.
Platformalar akkaunt yaratishda foydalanuvchilarning yoshini tasdiqlashlari shart boʻladi. Bu davlat tomonidan boshqariladigan e-Devlet portali orqali tasdiqlash jarayoni orqali amalga oshiriladi.
Ushbu tekshirish foydalanuvchining yosh toifasi haqidagi maʼlumotlarni oʻz ichiga oladi, lekin ularning ismi, aniq yoshi yoki boshqa shaxsiy maʼlumotlarini oshkor qilmaydi. 15 yoshgacha boʻlgan foydalanuvchilar uchun roʻyxatdan oʻtish soʻrovlari rad etiladi.
15–17 yoshdagi oʻsmirlarning akkauntlari shaxsiy boʻladi, ularni ommaviy qilish imkoniyati boʻlmaydi. Faqat ular kuzatadigan foydalanuvchilar ularga xabar yuborishlari mumkin. Ushbu yosh guruhi uchun jonli efir, kontaktlarni sinxronlashtirish va shaxsiylashtirilgan reklama uchun shaxsiy maʼlumotlardan foydalanish taqiqlanadi.
Bolalar profillari boshqa foydalanuvchilarga tavsiya etilmaydi va oʻsmirlarga kuzatiladigan boshqa akkauntlar taklif qilinmaydi.
Ijtimoiy tarmoqlar, shuningdek, ota-onalar va vasiylarga profil sozlamalari va vaqt cheklovlarini boshqarish uchun vositalarni taqdim etishlari shart boʻladi. Pullik tranzaksiyalar ota-ona nazorati ostida boʻladi va xarajatlar chegaralari belgilanadi.
Mavjud platforma akkauntlarining yoshi 2027 yil 31 martdan kechiktirmay tekshiriladi. Agar foydalanuvchi 15 yoshdan kichik boʻlsa, uning profili oldindan ogohlantirish bilan yopiladi.
