Yevropa Ittifoqi Rossiyadan oʻlat boʻyicha shaffof maʼlumotlar berishni soʻradi
Irkutsk viloyatidagi Vaboga qarshi instituti xodimi oʻlat bakteriyasidan vafot etgani haqida xabarlar tarqalgandi. AQSh ham Rossiyadagi fuqarolarini mazkur voqea sabab ogohlantirdi.
Yevropa Komissiyasi Rossiyani Sibir laboratoriyasidagi hodisa boʻyicha ishonchli epidemiologik va mikrobiologik maʼlumotlarni oʻz ichiga olgan shaffof hisobotlarni taqdim etishga chaqirdi, deb xabar beradi DW.
Bu haqda Yevropa Komissiyasining rasmiy vakili chorshanba, 7 oktabr kuni Bryusselda boʻlib oʻtgan brifingda maʼlum qildi.
Yevropa Komissiyasi Moskvani Irkutsk vaboga qarshi instituti xodimi Darya Shipilovaning toʻsatdan vafoti va Rossiyada pnevmonik vabo tarqalishi mumkinligi haqidagi xavotirlardan soʻng "Sibir laboratoriyasidagi hodisa boʻyicha tezkor shaffof hisobotlarni taqdim etishga" chaqirdi.
Eslatib oʻtamiz, ilgari Rossiyaning Irkutsk viloyatidagi Vaboga qarshi institut xodimi oʻlat bakteriyasi gumonidan vafot etgani haqida xabar berishgan edi. Marhum diagnostika maqsadida biomaterial toʻplash paytida laboratoriyada xavfli bakteriya boʻlgan sinov naychasini tasodifan sindirib qoʻygan deb taxmin qilingan.
Irkutsk viloyatida 28 yoshli ayolning oʻlimi sababi nomaʼlum etiologiyali pnevmoniya deb taʼriflangan.
Sanepidqoʻmita raisi oʻrinbosari Nurmat Otabekov Oʻzbekistondagi oʻlat haqidagi xavotirlarga oydinlik kiritgandi. Aytilishicha, Oʻzbekistonda oʻlat va boshqa oʻta xavfli yuqumli kasalliklarning chetdan kirib kelishi va tarqalishining oldini olishga qaratilgan zarur chora-tadbirlar tizimi yaratilgan.
