Kuchli taʼsir qiluvchi dorilarning yirik aylanmasiga chek qoʻyildi
Yunusoboddagi xonadon yertoʻlasida qonunga xilof ravishda saqlanayotgan 84 dona konvalyutadagi jami 1176 dona «Regapen» dori vositasi aniqlanib, ashyoviy dalil sifatida olib qoʻyilgan.
Kuchli taʼsir qiluvchi dori vositalarining noqonuniy muomalasiga chek qoʻyildi. Bu haqda Bojxona qoʻmitasi xabar berdi.
Bojxona organlari tomonidan huquqni muhofaza qiluvchi idoralar bilan hamkorlikda kuchli taʼsir qiluvchi dori vositalarining noqonuniy aylanmasiga qarshi kurashish boʻyicha amaliy chora-tadbirlar izchil davom ettirilmoqda.
Jumladan, Bojxona qoʻmitasining Kontrabandaga qarshi kurashish boshqarmasi xodimlari tomonidan Davlat xavfsizlik xizmati bilan hamkorlikda Toshkent shahrining Yunusobod tumanida tezkor-qidiruv tadbiri oʻtkazildi.
Tadbir davomida 47 yoshli fuqaroning xonadoni belgilangan tartibda koʻzdan kechirilganda, xonadon yertoʻlasida qonunga xilof ravishda saqlanayotgan 84 dona konvalyutadagi jami 1176 dona «Regapen» dori vositasi aniqlanib, ashyoviy dalil sifatida olib qoʻyildi.
Bojxona qoʻmitasi Markaziy bojxona laboratoriyasi tomonidan oʻtkazilgan sud-kimyoviy ekspertizasi xulosasiga koʻra, mazkur dori vositalari tarkibida jami 352,5 gramm «pregabalin» kuchli taʼsir qiluvchi moddasi mavjudligi tasdiqlandi.
Amaldagi tartiblarga koʻra, mazkur moddaning 10 grammdan yuqorisi koʻp miqdorni tashkil etadi va javobgarlikka sabab boʻladi.
Shuningdek, Buxoro viloyati bojxona boshqarmasi tezkor tuzilmalari tomonidan Gʻijduvon tumanida oʻtkazilgan tezkor tadbirda tarkibida «gabapentin» kuchli taʼsir qiluvchi moddasi boʻlgan 204 dona «Gabaten» dori vositasini 1600 AQSh dollariga sotishga uringan shaxs ham qoʻlga olindi.
Hozirda ushbu holatlar yuzasidan bojxona organlari tomonidan jinoyat ishlari qoʻzgʻatilib, tergov harakatlari olib borilmoqda.
