Afgʻonistondan olib kelingan salkam 50 kg narkotik modda toʻxtatib qolindi
“Mercedes-Benz” yuk mashinasi “Ayritom” chegara bojxona postida chuqurlashtirilgan tarzda tekshiruvdan oʻtkazildi. Narkosavdogarlar giyohvandlik vositalari fosh boʻlmasligi uchun ularni dastlab polietilen paketga solib, soʻngra folga qogʻozi bilan, keyin esa skotch bilan oʻrashgani fosh boʻlgan.
Davlat xavfsizlik xizmatining Chegara qoʻshinlari va Bojxona qoʻmitasi harbiy xizmatchilari sayʼ-harakati bilan katta miqdordagi narkotik moddalar kontrabandasiga chek qoʻyildi. Bu haqda DXX Platina.uzʼga xabar berdi.
Xususan, Afgʻoniston Respublikasidan Oʻzbekiston Respublikasi hududiga kirib kelayotgan, Termiz tumanida yashovchi, 1985 y.t. fuqaro boshqaruvidagi “Mercedes-Benz” rusumli yuk avtomashinasi “Ayritom” chegara bojxona postida chuqurlashtirilgan tarzda tekshiruvdan oʻtkazildi.
Tekshiruv jarayonida avtomashina tirkamasining pol qismi ostiga jami 98 dona oʻramda 39 kg 86 gr “gashish” va 9 kg 498 gr “opiy” moddalari yashirib qoʻyilganligi maʼlum boʻldi.
Taʼkidlash lozim, narkosavdogarlar giyohvandlik vositalari fosh boʻlmasligi uchun ularni dastlab polietilen paketga solib, soʻngra folga qogʻozi bilan, keyin esa skotch bilan oʻrashgan.
Hozirda holat yuzasidan Jinoyat Kodeksining 246-moddasi 2-qismi bilan jinoyat ishi qoʻzgʻatilib, tergov harakatlari doirasida ushbu narkotik moddalarning buyurtmachilarini aniqlash boʻyicha chora-tadbirlar amalga oshirilmoqda.
