Tramp "sunʼiy intellekt" atamasini yangi nomga almashtirdi
AQSh prezidenti Donald Tramp ijro etuvchi hokimiyat hujjatlari va muloqotlarida "sunʼiy intellekt" (AI) atamasini "superintellekt" (SI) bilan almashtirish toʻgʻrisidagi farmonni imzoladi. Oq uy nomning oʻzgarishini zamonaviy texnologiyalarning imkoniyatlarini aks ettirish istagi sifatida izohladi.
Donald Tramp sunʼiy intellektni qayta nomlash boʻyicha hujjatni eʼlon qildi. AQSh prezidenti "superintellekt"ning federal taʼrifini ishlab chiqish va yangi atamani amaliyotga joriy etish boʻyicha qoʻshimcha choralar koʻrish toʻgʻrisida farmon chiqardi. Davlat departamenti ilgari diplomatlarga hujjatlar va muloqotlarda SI oʻrniga ushbu atamadan foydalanishni tavsiya qilgan edi.
AQSh prezidenti Donald Tramp ijro etuvchi hokimiyat hujjatlari va muloqotlarida "sunʼiy intellekt" (AI) atamasini "superintellekt" (SI) bilan almashtirish toʻgʻrisidagi farmonni imzoladi, deb xabar berdi Oq uy matbuot xizmati.
"Ushbu farmon barcha departamentlar va agentliklarga rasmiy yozishmalar, ommaviy muloqotlar, siyosiy hujjatlar va ijro etuvchi hokimiyat ichidagi meʼyoriy hujjatlarda superintellekt va SI atamalaridan foydalanishni hamda sunʼiy intellekt yoki AI atamalarini qoʻllashni toʻxtatishni buyuradi", deyiladi bayonotda.
Farmonga koʻra, Prezidentning fan va texnologiyalar boʻyicha yordamchisi ushbu texnologik sohaning holatini aks ettiruvchi "superintellekt" va SI atamalarining federal taʼrifini ishlab chiqishi kerak. Shuningdek, u yangi taʼrifni amaliyotga joriy etish uchun zarur boʻlgan qoʻshimcha ijro etuvchi harakatlarni ham belgilab berishi lozim.
Oq uy nomning oʻzgarishini zamonaviy texnologiyalarning imkoniyatlarini aks ettirish istagi sifatida izohladi. "Superintellekt" nomi bugungi kunda ishlab chiqilayotgan texnologiyalarning haqiqiy imkoniyatlarini ifodalaydi va inson ijodkorligining yangi qirralarini ochadi", deb taʼkidlandi manbada.
Maʼmuriyatning fikricha, superintellekt atamasidan foydalanish federal agentliklarning eʼtiborini sunʼiy intellekt imkoniyatlarini kengaytirishga va ushbu texnologiyalarni samarali qoʻllashga qaratadi.
Shuningdek, oʻsha kuni Google, Anthropic, Meta, OpenAI, xAI va Nvidia rahbarlari Tramp bilan sunʼiy intellekt xavfsizligini nazorat qilish boʻyicha kelishuv imzoladilar. Kompaniyalar ichki modellar monitoringini, mustaqil auditlarni va boshqaruv qoʻmitalarini tashkil etishga kelishib oldilar.
