Toshkent metrosi ilk bor bir kunda 1,2 mlndan oshiq yoʻlovchiga xizmat koʻrsatdi
Omadli 1 200 000-yoʻlovchiga 1 yil davomida jamoat transportidan bepul foydalanish imkonini beruvchi maxsus transport toʻlov kartasi sovgʻa qilindi.
28 sentabr kuni Toshkent metropoliteni tarixida yangi rekord qayd etildi.
Bir kun davomida ilk marotaba 1200124 nafar yoʻlovchiga xizmat koʻrsatildi.
Mazkur muhim voqea munosabati bilan metropoliten masʼul xodimlari ishtirokida 1200000-yoʻlovchini aniqlash boʻyicha maxsus tadbir tashkil etildi.
Tadbir davomida ushbu tarixiy koʻrsatkichni qayd etgan omadli 1 200 000-yoʻlovchi aniqlandi.
Unga metropoliten jamoasi nomidan esdalik sovgʻasi, shuningdek, bir yil davomida jamoat transportidan bepul foydalanish imkonini beruvchi maxsus transport toʻlov kartasi tantanali ravishda topshirildi.
Eslatib oʻtamiz, 21 sentabr kuni Toshkent metrosidan 1 mln 182 ming nafar yoʻlovchi foydalangandi.
