"Bolalarni tarbiya qilsak, kelajak bizniki boʻladi" — Prezident ota-onalarga murojaat qildi
“Men ham otaman, men ham boboman. Hammamiz kim boʻlishimizdan qatʼi nazar, eng katta baxt — bolamizning koʻziga qarab, uning baxtini koʻrish. Butun Oʻzbekiston yoshlarining ota-onalarini bir narsaga daʼvat qilmoqchiman: erinmanglar, tarbiya qilinglar, qattiqqoʻl boʻlinglar”, — dedi davlat rahbari.
Prezident Shavkat Mirziyoyev shaxmatchilar bilan uchrashuvda chempionlarning bugungi yutuqlarida ularning ota-onalari mehnati va tarbiyasi katta oʻrin tutganini alohida taʼkidladi.
"Eng katta baxt ota-ona uchun nima? Farzandining kamolini, baxtini koʻrish. Mana, ota-onalar oʻtiribdi. Men ham otaman, men ham boboman. Hammamiz kim boʻlishimizdan qatʼi nazar, eng katta baxt — bolamizning koʻziga qarab, uning baxtini koʻrish", — dedi davlat rahbari.
Prezident shaxmatchilar erishayotgan natijalar ortida yillar davomida farzandiga talabchan boʻlgan, uni qoʻllab-quvvatlab, yoʻlini ochgan ota-onalar turganini qayd etdi.
"Ota-onadan katta sizlarga duogoʻy, sharoit yaratadigan va yoʻllaringizni ochib beradigan inson dunyoda yoʻq. Shuning uchun butun Oʻzbekiston yoshlarining ota-onalariga minnatdorlik bildirib, bir narsaga daʼvat qilmoqchiman: erinmanglar, tarbiya qilinglar, qattiqqoʻl boʻlinglar. Bolalarni tarbiya qilsak, kelajak bizniki boʻladi", — dedi Prezident.
