Oʻzbekistonda 2031 yilda BMTning yirik kongressi boʻlib oʻtadi
Saida Mirziyoyeva BMT Bosh Assambleyasidan soʻng Abu-Dabida Jinoyatchilikning oldini olish va jinoiy odil sudlov boʻyicha 15-kongressda qatnashdi.
Oʻzbekiston 2031 yilda BMTning yirik kongressiga mezbonlik qilishi kutilmoqda.
Prezident Administratsiyasi rahbari Saida Mirziyoyeva BMT Bosh Assambleyasidan soʻng Abu-Dabida Jinoyatchilikning oldini olish va jinoiy odil sudlov boʻyicha 15-kongressda ishtirok etdi.
Kongressda transmilliy jinoyatchilik, terrorizm, narkotrafik, korrupsiya, ekologik huquqbuzarliklarga qarshi kurashish, bolalarni himoya qilish va qonun ustuvorligini mustahkamlash kabi masalalar muhokama qilinmoqda.
Saida Mirziyoyeva kongress doirasida BMT Bosh kotibi oʻrinbosari, BMTning Narkotiklar va jinoyatchilik boʻyicha boshqarmasi ijrochi direktori Monika Juma bilan ham uchrashdi.
Eng muhim yangilik — Jinoyatchilikning oldini olish va jinoiy odil sudlov boʻyicha navbatdagi BMT kongressini 2031 yilda Oʻzbekistonda oʻtkazish tashabbusi ishtirokchi davlatlar tomonidan qoʻllab-quvvatlandi. Bu tashabbus kongressning yakuniy deklaratsiyasida ham oʻz aksini topdi.
“Bu — bizning ochiqligimizga, muloqotga doim tayyorligimizga hamda umumiy maqsadlar yoʻlida saʼy-harakatlarni birlashtira olishimizga bildirilgan ishonchdir”, — dedi Saida Mirziyoyeva.
Besh yildan soʻng Oʻzbekiston jinoyatchilikka qarshi kurashish, odil sudlov va qonun ustuvorligi masalalari muhokama qilinadigan BMTning nufuzli global maydoniga mezbonlik qiladi.
