Ohangarondagi bogʻchada hasharotlarga qarshi dorini ichib qoʻygan bola vafot etdi
Holat 2026 yil 28 avgust kuni yuz bergani aniqlandi. Tarbiyalanuvchi oshxonada hasharotlarga qarshi ishlatiladigan BSM vositasini ichib qoʻygan. Bola zudlik bilan Ohangaron shahar tibbiyot birlashmasiga olib borilgan. Afsuski, uning hayotini saqlab qolishning imkoni boʻlmagan.
Ohangaronda bogʻchada hasharotlarga qarshi dori ichib qoʻygan 3 yoshli bola vafot etdi. Toshkent viloyati maktabgacha va maktab taʼlimi boshqarmasi hodisani tasdiqladi.
Hodisa Ohangaron shahar Maktabgacha va maktab taʼlimi boʻlimi tasarrufidagi 6-sonli maktabgacha taʼlim tashkilotida roʻy bergan.
Oʻrganishlar natijasida holat 2026 yil 28 avgust kuni yuz bergani aniqlandi. 2023 yilda tugʻilgan tarbiyalanuvchi oshxonada hasharotlarga qarshi ishlatiladigan BSM vositasini ichib qoʻygan. Bola zudlik bilan Ohangaron shahar tibbiyot birlashmasiga olib borilgan. Afsuski, uning hayotini saqlab qolishning imkoni boʻlmagan.
Mavjud maʼlumotlarga koʻra, bolaning buvisi mazkur tashkilot oshxonasida autsorsing tashkiloti xodimi — oshpaz sifatida ishlagan. Hodisa tarbiyalanuvchi buvisining yoniga, oshxonaga kirgan vaqtda sodir boʻlganligi aytilgan.
Biroq bu holat yuzasidan yakuniy xulosa faqat vakolatli organlar tomonidan oʻtkazilayotgan tergov va surishtiruv natijalariga koʻra beriladi.
Tegishli tashkilotlar tomonidan bolaning oshxonaga qanday kirgani, xavfli vosita uning qoʻli yetadigan joyda nima sababdan turgani va uni saqlash uchun kim masʼul boʻlgani har tomonlama oʻrganilmoqda.
"Bola hayotiga zomin boʻlgan hodisaning biror jihati eʼtibordan chetda qolmaydi. Tergov ishlari davom etmoqda, aybdorligi aniqlangan shaxslarga nisbatan qonun doirasida chora koʻriladi", deyiladi xabarda.
