Milliy taomlarni targʻib qilishga qaratilgan "Plov Festivali" boshlandi
28 sentabrdan 18 oktabrgacha davom etadigan festival doirasida Oʻzbekistonning turli hududlariga xos yetti xil palov bir dasturga jamlangan. Festivalning asosiy maqsadi milliy taomlarimizni keng targʻib qilish, hududiy gastronomik anʼanalarni ommalashtirish va gastronomik turizmga qiziqishni oshirish sanaladi.
Oʻzbekistonda milliy taomlarimizni targʻib qilishga qaratilgan "Plov Festivali" boshlandi. Festival "Novikov Group & Family Garden" xalqaro tarmogʻiga qarashli "Lali" restoranlarida oʻtkazilmoqda.
28 sentabrdan 18 oktabrgacha davom etadigan festival doirasida Oʻzbekistonning turli hududlariga xos yetti xil palov bir dasturga jamlangan.
Toshkent, Fargʻona vodiysi, Buxoro, Qashqadaryo, Samarqand va Navoiyga xos palovlar mehmonlarga taqdim etilmoqda.
Har bir taom oʻz hududining anʼanaviy tayyorlash usuli va mahsulotlari bilan ajralib turadi. Jumladan, Buxoroning qazi va goʻsht solingan "Osh sofi", Qashqadaryoning toʻy palovi, Samarqandning behili uy palovi hamda Navoiy viloyatining anor qoʻshilgan Uchquduq palovi festival menyusidan joy olgan.
Toshkent va Olmaotadagi "Lali" restoranlarida esa menyu hududiy xususiyatlardan kelib chiqib biroz farq qiladi. Bu yerda Buxoroning "Kobuli" va Andijonning qoʻy goʻshtidan tayyorlanadigan palovi ham taqdim etilmoqda.
Tashkilotchilarga koʻra, festivalning asosiy maqsadi milliy taomlarimizni keng targʻib qilish, hududiy gastronomik anʼanalarni ommalashtirish va gastronomik turizmga qiziqishni oshirish.
Maʼlumot uchun, "Plov Festivali" "Lali" restoranlarida ikkinchi bor oʻtkazilmoqda. Ilk festival gastronomiya orqali milliy madaniyatni targʻib qilgani uchun "Eʼtirof" mukofotiga sazovor boʻlgan.
