Ustoz qadrini eslatgan “Dars”: kinoteatrlarda qoʻngʻiroq chalindi, endi navbat tomoshabinlarga!
“Dars” bugungi oʻzbek kinosida yetishmayotgan oddiy, ammo muhim qadriyatlar haqida gapiradi. Unda tomoshabinni jalb qilish uchun sunʼiy mojarolar, turli fitna va qasoslarga urgʻu berilmaydi.
Kecha, 24 sentabr kuni Oʻzbekiston Milliy kino sanʼati saroyida “Dars” badiiy filmining premerasi boʻlib oʻtdi. Samimiy va hayotiy voqealar asosiga qurilgan kartina tomoshabinlarda iliq taassurot qoldirdi.
“Dars” bugungi oʻzbek kinosida yetishmayotgan oddiy, ammo muhim qadriyatlar haqida gapiradi. Unda tomoshabinni jalb qilish uchun sunʼiy mojarolar, turli fitna va qasoslarga urgʻu berilmaydi. Aksincha, inson taqdirini oʻzgartira oladigan ustoz, kitob, tarbiya, mehr-oqibat va oilaviy qadriyatlar filmning asosiy kuchiga aylangan.
Voqealar markazida — Oyqiz. Uning orzulari, xatolari va hayotiy sinovlari orqali shoshqaloq va xayolparast qizdan mustaqil fikrlaydigan, masʼuliyatli va yetuk insonga aylanish jarayoni koʻrsatiladi. Hanifa xola obrazi esa baʼzan insonning butun hayotini oʻzgartirish uchun bitta yaxshi ustozning oʻzi kifoya ekanini eslatadi.
Ayniqsa, 1 oktabr — Oʻqituvchi va murabbiylar kuni arafasida filmning katta ekranlarga chiqishi oʻziga xos maʼno kasb etadi. “Dars” — farzand bilan birga koʻrish, keyin esa u bilan ustoz, kitob va hayotdagi maqsad haqida gaplashish mumkin boʻlgan oilaviy film.
Bugun, 25 sentabrdan “Dars” filmi yurtimiz kinoteatrlarida namoyish etiladi. Ustoz qadri, kitob va insoniylik haqidagi samimiy hikoyani endi katta ekranlarda tomosha qilish mumkin.
Ushbu film Kontent markazi va MA’NO CINEMA tomonidan suratga olingan.
