Saida Mirziyoyeva BlackRock rahbarlari bilan uchrashdi
Prezident Administratsiyasi rahbari Saida Mirziyoyevaning AQShga tashrifi yuqori darajadagi muhim uchrashuvlar bilan qizgʻin davom etmoqda.
Saida Mirziyoyeva Nyu-Yorkda “BlackRock” rahbariyati — kompaniya prezidenti Robert Kapito, vitse-rais Tomas Donilon, “Global Infrastructure Partners” raisi va bosh ijroiya direktori Adebayo Ogunlessi, Moliyaviy va strategik investorlar guruhi global rahbari hamda kompaniyaning Yaqin Sharq mintaqasi boʻyicha rahbari Charlz Xatami bilan uchrashdi.
Muloqot davomida 2027 yilda Toshkent xalqaro moliya markazi faoliyatini yoʻlga qoʻyish masalasi muhokama qilindi. BlackRock ushbu Markaz konsepsiyasi va tuzilmasini ishlab chiqishda koʻmaklashmoqda.
AQSh ishbilarmon doiralari vakillari ishtirokidagi qoʻshma davra suhbatida Oʻzbekiston hamda mintaqaning yaqin oʻn yilliklarga moʻljallangan rivojlanish istiqbollari yuzasidan fikr almashildi.
Oʻzbekiston yirik, samarali, sifatli sarmoyalar uchun yangi imkoniyatlar maydoniga aylanayotgani taʼkidlandi.
