60 mlrd soʻmlik qurilish ishlarini olib bermoqchi boʻlganlar ushlandi
Zangiotada 3 nafar shaxs Ichki ishlar vazirligiga qarashli bogʻchalardagi qurilish va taʼmirlash ishlarini olib berish evaziga MChJ rahbaridan 100 000 dollar talab qilgan. Ular bu ishni yuqori lavozimlarda ishlovchi tanishlari orqali hal qilmoqchi boʻlgan.
Zangiota tumanida firibgarlik fosh etildi.
Prokuratura departamentiga koʻra, 3 nafar shaxs oʻzaro til biriktirib “S.C.” MChJ rahbari M.N.ga yuqori lavozimdagi tanishlari orqali IIVga qarashli 4 ta davlat maktabgacha taʼlim tashkilotidagi 60 mlrd soʻmlik rekonstruksiya va qurilish ishlarini olib berishni vaʼda qilgan.
Ular “xizmat” uchun 100 000 AQSh dollari soʻragan. Shundan 20 000 AQSh dollarini olgan vaqtida ashyoviy dalillar bilan ushlangan.
Hozirda, mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qoʻzgʻatilib, tergov harakatlari oʻtkazilmoqda.
