Saida Mirziyoyeva BMT qarorgohida Antoniu Guterrish bilan uchrashdi
Unda oʻzaro aloqalarni rivojlantirish masalalariga eʼtibor qaratildi. Hozirda BMT ishtirokida Oʻzbekistonda 166 ta qoʻshma loyiha amalga oshirilmoqda.
Saida Mirziyoyeva BMT qarorgohida Antoniu Guterrish bilan muloqot oʻtkazdi.
Prezident Administratsiyasi rahbari Nyu-York shahrida BMT Bosh kotibi bilan uchrashdi. Unda oʻzaro aloqalarni rivojlantirish masalalariga eʼtibor qaratildi.
Xalqaro munosabatlar tizimi uchun murakkab boʻlgan hozirgi davrda global miqyosda yetakchilik salohiyatini namoyon etayotgani hamda xavfsizlikning barcha asosiy jabhalarida mamlakatimizni qoʻllab-quvvatlayotgani uchun janob Guterrishga samimiy minnatdorlik bildiraman,- dedi S.Mirziyoyeva.
Mamlakatimiz va BMT institutlari oʻrtasidagi munosabatlar bugun aniq koʻrsatkichlar bilan mustahkamlanib bormoqda. Hozirgi vaqtda tashkilot tuzilmalari ishtirokida yurtimizda umumiy qiymati 293 million dollarlik 166 ta qoʻshma loyiha amalga oshirilmoqda. Ushbu dasturlar sogʻliqni saqlash, sifatli taʼlim, kambagʻallikni qisqartirish va ekologik barqarorlikni taʼminlash kabi eng muhim yoʻnalishlarni qamrab olgan.
Prezident Administratsiyasi rahbarining Antoniu Guterrish bilan muloqoti Oʻzbekistonning BMT maydonida dunyo miqyosidagi dolzarb chaqiriqlarga yangicha gʻoyalar bilan javob berish, global muammolarga amaliy yechim topish boʻyicha qatʼiy intilishini namoyon etadi.
