Markaziy bank "Anorbank" masalasida bayonot bilan chiqdi
Ushbu bankning asosiy aksiyadori Qahramonjon Olimovga odam oʻgʻirlash aybi qoʻyilgandi. Olimov Oʻzbekistonda sirtdan hibsga olingan va xalqaro qidiruvga berilgan.
Markaziy bank soʻnggi kunlarda turli shov-shuvlarga sabab boʻlayotgan "Anorbank" masalasida bayonot berdi.
Avval maʼlum qilganimizdek, “Anorbank” asosiy aksiyadori Qahramonjon Olimovga odam oʻgʻirlash aybi qoʻyilgandi.
Unga koʻra, Olimov Oʻzbekistonda sirtdan hibsga olingan va xalqaro qidiruvga berilgan.
Bankning rasmiy munosabatiga koʻra, mazkur holat shaxsiy masala boʻlib, bankning kapitali, boshqaruvi va operatsion faoliyatiga aloqador emas. Vakolatli organlar tomonidan bankka hech qanday rasmiy soʻrov ham kelib tushmagan.
Oʻz navbatida, Markaziy bank ham vaziyatni nazoratga olganini, ANORBANK faoliyati barqaror ekanini, bankning barcha majburiyatlari bajarilayotgani va mijozlarga xizmat koʻrsatish odatiy rejimda davom etayotganini maʼlum qildi.
"Umuman, biznesda rahbarlar almashishi, aksiyadorlar atrofida turli jarayonlar boʻlishi — normal holat. Har bir tarqalgan xabarni bankda muammo boshlandi, deb qabul qilish shart emas. Axborot maydonida raqobat ham bor, manipulyatsiya ham, turli manfaatlar ham boʻlishi mumkin", deyiladi munosabatda.
