Namanganda oʻqituvchi 1-sinf oʻquvchisini kaltakladi
Holat yuzasidan taʼlim boshqarmasi tomonidan ishchi guruh tuzilib, maktabda xizmat tekshiruvi boshlangan.
Namangan viloyati Kosonsoy tumanidagi 39-sonli maktabda boshlangʻich sinf oʻqituvchisi 1-sinf oʻquvchisini kitobni oʻqib bera olmagani uchun urgani aytilmoqda. Bu haqda viloyat Maktabgacha va maktab taʼlimi boshqarmasi xabar berdi.
Ijtimoiy tarmoqlarda tarqalgan "Bola kaltaklandimi?" sarlavhali video yuzasidan boshqarma tomonidan ishchi guruh tuzilib, maktabda xizmat tekshiruvi boshlangan.
Dastlabki oʻrganishlarga koʻra, voqea 16 sentabr kuni soat 10:30 larda, uchinchi dars vaqtida sodir boʻlgan. Oʻqituvchi 1-sinf oʻquvchisini kitobni oʻqib bera olmagani sababli bir necha bor urgan.
Ayni vaqtda holatga huquqiy baho berish hamda unga masʼul mansabdor shaxslarning xatti-harakatlarini oʻrganish maqsadida xizmat tekshiruvi davom ettirilmoqda.
Tekshiruv yakunlari boʻyicha maktab rahbariyati va oʻqituvchiga nisbatan qonunchilikda belgilangan tartibda tegishli choralar koʻrilishi maʼlum qilindi.
