Tibbiyotda “5+1” shaklidagi 6 yillik umumiy bakalavriat taʼlimi joriy etiladi

Tibbiyot va farmatsevtika sohasida kadrlar tayyorlash tizimi tubdan takomillashtiriladi.

“Tibbiyot va farmatsevtika sohasida kadrlar tayyorlash tizimini tubdan takomillashtirish chora-tadbirlari toʻgʻrisida”gi Prezident Farmoni (PF–191-son, 10.09.2026 y.) qabul qilindi.

Farmonga koʻra, 2027/2028 oʻquv yilidan bakalavriat taʼlim yoʻnalishlari boʻyicha tibbiyot taʼlimi sohasiga ajratilgan davlat buyurtmasi parametrlari taʼlim yoʻnalishlari kesimida Sogʻliqni saqlash vazirligi (Vazirlik) tomonidan tasdiqlanadi. Bunda:

- Aholi salomatligini tahlil qilish ilmiy-tadqiqot markazi tibbiyot va farmatsevtika kadrlariga boʻlgan joriy va istiqboldagi ehtiyojni oʻrganish boʻyicha asosiy ishchi organ hisoblanadi;

- qabul koʻrsatkichlari tibbiyot va farmatsevtika kadrlariga boʻlgan joriy va istiqboldagi ehtiyojdan kelib chiqib, hududlar ehtiyoji, tibbiyot tashkilotlarining ehtiyoji hamda tegishli mutaxassisliklar boʻyicha kadrlar yetishmovchiligini hisobga olgan holda shakllantiriladi.

2027/2028 oʻquv yilidan tibbiyot sohasida kadrlar tayyorlovchi oliy taʼlim tashkilotlarida:

- davolash ishi bakalavriat taʼlim yoʻnalishi negizida “5+1” shaklidagi (bitiruvchi kurs talabalari bir yil toʻliq amaliyot oʻtashi shaklida) 6 yillik umumiy tibbiyot bakalavriat taʼlim yoʻnalishi joriy etiladi;

- amalda davolash ishi bakalavriat taʼlim yoʻnalishining tegishli bosqichlarida tahsil olayotgan talabalarning oʻquv jarayonlari yangi moslashtirilgan oʻquv reja va dasturlar asosida tashkil etiladi;

- umumiy tibbiyot bakalavriat taʼlim yoʻnalishi bitiruvchilari umumiy amaliyot shifokori kvalifikatsiyasiga ega boʻladi va ular belgilangan tartibda oilaviy shifokor lavozimida faoliyat yuritishi mumkin boʻladi;

- tibbiyot sohasining barcha bakalavriat taʼlim yoʻnalishlarida bitiruvchi kurs talabalari uchun toʻliq oʻquv yili davomida amaliyot oʻtash tizimi joriy etiladi;

- stomatologiya yoʻnalishida talabalarning amaliy mashgʻulotlarini tashkil etish maqsadida tibbiyot oliy taʼlim muassasalariga stomatolog poliklinikalari biriktirib beriladi.

2027/2028 oʻquv yilidan boshlab:

- oʻrta tibbiyot xodimlarini tayyorlashning ikki yillik oʻquv dasturlariga qabul bekor qilinadi;

- oliy tibbiy hamrohlik ishi bakalavriat taʼlim yoʻnalishi boʻyicha kadrlar tayyorlashda rivojlangan xorijiy davlatlarning oliy taʼlim tashkilotlari bilan hamkorlikda qoʻshma taʼlim dasturlari joriy etiladi;

- tibbiy hamrohlik ishi mutaxassisligida ilmiy-pedagogik kadrlarni tayyorlash maqsadida magistratura dasturi yoʻlga qoʻyiladi.

- 2027 yil 1 yanvardan tibbiyot, farmatsevtika va pedagog xodimlarning oylik maoshlariga quyidagi miqdorlarda bazaviy tarif stavkasi yoki lavozim maoshiga nisbatan har oylik ustamalar belgilanadi:

-bakalavriatni tamomlagan hamshiralar va tibbiyot ogʻalariga – mehnatga haq toʻlashning eng kam miqdorining 1 baravari;

-magistraturani tamomlagan hamshiralar va tibbiyot ogʻalariga – mehnatga haq toʻlashning eng kam miqdorining 2 baravari;

-oilaviy tibbiyot boʻyicha rezidenturani tamomlagan oilaviy shifokorlar va shu yoʻnalishda magistraturani tamomlagan pedagog kadrlarga – mehnatga haq toʻlashning eng kam miqdorining 4 baravari.