Ekologiya va kadastrlar palatasi xodimlari tezkor tadbirda ushlandi
Ular davlat zaxirasidagi 2 gektar yer maydonini kadastrda ishlovchi tanish orqali auksionga chiqarib arzon narxda olib berishni vaʼda qilgan.
Yer olib berishni vaʼda qilgan tuman Ekologiya va atrof-muhitni muhofaza qilish boʻlimi va Davlat kadastrlar palatasi xodimlari ushlandilar.
Bosh prokuratura huzuridagi Departamentning Oltinsoy tumani boʻlimi va boshqa huquqni muhofaza qiluvchi organ xodimlari hamkorligida tezkor tadbir oʻtkazildi.
Unda Uzun tumani Ekologiya va atrof-muhitni muhofaza qilish boʻlimi bosh mutaxassisi M.B. 2 000 AQSh dollari evaziga fuqaro R.Yu.ga "Ulanqul" MFY hududidagi davlat zaxirasidagi 2 gektar yer maydonini kadastrda ishlovchi tanishi orqali auksionga chiqarib arzon narxda olib berishini aytgan.
U ushbu pullar hisobidan 12 mln soʻmni olgan vaqtida ushlanib, davom etgan tezkor tadbirda Uzun tumani Davlat kadastrlar palatasi yerlarni auksionga chiqarish shoʻʼbasi yetakchi mutaxassisi K.N. 12 mln soʻmni M.B.dan olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 210-moddasi (pora olish) bilan jinoyat ishi qoʻzgʻatilib, tergov harakatlari oʻtkazilmoqda.
