Toshkent metrosida yoʻlovchi tashish boʻyicha rekord koʻrsatkich qayd etildi

Toshkent metropolitenida yoʻlovchi tashish boʻyicha rekord koʻrsatkich qayd etildi.

14 sentabrdan mamlakatimizdagi barcha oliy taʼlim muassasalarida barcha bosqich talabalari uchun yangi oʻquv yili boshlandi. Shu munosabat bilan, kutilganidek, jamoat transportiga, xususan, Toshkent metropoliteni xizmatlariga boʻlgan talab sezilarli darajada oshdi.

Jumladan, 14 sentabr kuni Toshkent metropolitenida yoʻlovchi tashish boʻyicha navbatdagi rekord koʻrsatkich qayd etildi. Kun davomida metropoliten xizmatlaridan 1 165 550 nafar yoʻlovchi foydalandi.

Eng koʻp yoʻlovchi foydalangan bekatlar orasida Chilonzor bekati birin oʻrinni egalladi (64 616 nafar). Keyingi oʻrinlarda Buyuk Ipak yoʻli, Beruniy, Chinor, Olmazor bekatlari joylashgan.

Maʼlumot uchun, bundan avvalgi eng yuqori koʻrsatkich 2026 yil 8 may kuni qayd etilgan boʻlib, oʻsha kuni Toshkent metropoliteni xizmatlaridan 1 117 061 nafar yoʻlovchi foydalangan edi.

Mutaxassislar tomonidan olib borilayotgan kuzatuv va tahlillarga koʻra, yoʻlovchilar oqimining oʻsish tendensiyasi kelgusida ham saqlanib qolishi kutilmoqda. Xususan, oktabr oyida kunlik yoʻlovchilar soni 1 200 000 nafarga yetishi kutilmoqda.