Toshkent kelajagi har qachongidan ham jiddiy eʼtibor va tahlilni talab qilmoqda — Saida Mirziyoyeva

Prezident Administratsiyasi rahbari Saida Mirziyoyeva qator yirik meʼmoriy loyihalar tashabbuskorlari, mustaqil mutaxassislar va urbanistlar, yetakchi ixtisoslashgan ijodiy studiyalar hamda oliy taʼlim muassasalari vakillari bilan uchrashdi.

Toshkent shiddat bilan kengayib bormoqda, shaharsozlik va ekologiya bilan bogʻliq bugungi vaziyatni inobatga olsak, uning kelajagi har qachongidan ham jiddiy eʼtibor va tahlilni talab qilmoqda.

PA rahbari ​shu maqsadda qator yirik meʼmoriy loyihalar tashabbuskorlari, mustaqil mutaxassislar va urbanistlar, yetakchi ixtisoslashgan ijodiy studiyalar hamda oliy taʼlim muassasalari vakillari bilan uchrashuv oʻtkazdi.

​"Birgalikda yechim topishimiz kerak boʻlgan masalalar talaygina — muhandislik kommunikatsiyalari va ijtimoiy obʼektlar zimmasiga katta yuk tushayotganidan tortib, elektr hamda suv taʼminoti muammolarigacha.

Yangi qurilishlar shaharni rivojlantirishga xizmat qilishi, qoʻshimcha nomutanosiblik keltirib chiqarmasligi va hududiy tizimlarni ortiqcha zoʻriqtirmasligi kerak", deya taʼkidladi Mirziyoyeva.

"​Oldimizda turgan maqsadlar ulkan, biz Toshkentni har bir yurtdoshimiz hamda shahrimiz mehmonlari uchun yanada qulay, koʻrkam, ozoda va xavfsiz maskanga aylantirish niyatida boʻlgan biznes vakillariga koʻmaklashamiz. Aynan shunday yondashuv Yangi Oʻzbekiston siyosatiga toʻla mos keladi.

​Chunki bunday tashabbuskor biznesni har tomonlama qoʻllab-quvvatlash — Prezidentimiz tomonidan zimmamizga yuklatilgan eng asosiy vazifalardan biridir", deya xulosa qiladi Prezident Administratsiyasi rahbari.