Jurnalist Alisher Roʻzioxunovning xotirasiga bagʻishlangan tadbir boʻlib oʻtdi

FikrLab milliy kontent maydonida marhum jurnalist Alisher Roʻzioxunovning xotirasiga bagʻishlangan tadbir boʻlib oʻtdi.

Unda Oʻzbekiston Jurnalistlar uyushmasi rahbariyati, OAV va jamoatchilik vakillari, marhum jurnalistning doʻstlari hamda yaqinlari ishtirok etdi.

Tadbirda Alisher Roʻzioxunovning jurnalistika sohasidagi qisqa, lekin mazmunli faoliyati, uning kasbiy va insoniy fazilatlari, hamkasblari taqdirida qoldirgan yorqin izi haqida soʻz yuritildi.

Tadbir yakunida Alisher Roʻzioxunov xotirasiga bagʻishlab "MY5" telekanali ijodiy jamoasi tomonidan tayyorlangan hujjatli film namoyish etildi.

Filmda uning hayoti, jurnalistikadagi faoliyati va kasbga sadoqati hamkasblari xotiralarida tasvirlanadi.

Alisher Roʻzioxunov 2025 yil 26 fevral kuni 32 yoshida xastalikdan vafot etgandi. U turli internet nashrlarida bir necha yillar davomida faoliyat yuritib, davlat va jamiyat hayotidagi dolzarb mavzularda yuzlab materiallar tayyorlagan.