Buxorodagi neft saqlash omborida yongʻin yuz berdi
Hodisa sabab 3 kishi jarohat olgan. "Oʻzbekneftgaz" hodisa ishlab chiqarish quvvatlariga taʼsir etmasligi maʼlum qildi.
15 sentabr kuni Buxoro viloyati Qorovulbozor tumanidagi neft mahsulotlarini saqlash omborida yongʻin sodir boʻldi.
FVV maʼlumotiga koʻra, soat 10:30 da «112» tizimiga Choʻlquvar mahallasidagi neft ombori rezervuarlaridan birida yongʻin chiqqanligi haqida xabar kelib tushgan.
Hodisa joyiga 14 ta yongʻin-qutqaruv ekipaji jalb qilingan. Yongʻin 48 daqiqada toʻliq oʻchirilgan. Natijada bitta yoqilgʻi rezervuari zararlangan.
Hodisa sabab 3 kishi jarohat olgani maʼlum qilindi.
"Oʻzbekneftgaz" matbuot xizmati mazkur holat yuzasidan rasmiy bayonot berdi. Unga koʻra, ushbu rezervuarlar zavod hududidan tashqarida joylashgan boʻlib, ishlab chiqarish quvvatlariga taʼsir etmasligi maʼlum qilinadi.
Hozirda hodisa oqibatlarini toʻliq bartaraf etish boʻyicha barcha zarur chora-tadbirlar amalga oshirilmoqda.
