"Qamchiq" dovoni hududida adashib qolgan 17 kishi qutqarildi
Hodisa oqibatida tan jarohati olganlar yoʻqligi maʼlum qilingan.
FVV qutqaruvchilari "Qamchiq" dovoni hududida adashib qolgan 17 nafar fuqarolarga amaliy yordam koʻrsatishdi.
12 sentabr kuni "112" tizimi orqali "Qamchiq" Maxsus qutqaruv boshqarmasiga Toshkent viloyati Ohangaron tumani "Toshkent-Oʻsh" avtomobil yoʻlining "Vodiy-Toshkent" yoʻnalishi 107-kilometrdagi "Chinor" QFY hududida fuqarolar adashib qolgani boʻyicha maʼlumot kelib tushdi.
Maʼlum boʻlishicha, 17 nafar fuqarolar dam olish maqsadida chiqib togʻli hududda adashib qolgan.
Xabarga asosan, zudlik bilan voqea joyiga qidiruv-qutqaruv boʻlinmalari jalb qilindi. Qidiruv-qutqaruv ishlari davomida qutqaruvchilar togʻ qiyaliklaridan jami 17 nafar fuqaroni topib, ularni xavfsiz hududga olib tushishdi hamda yashash manzillariga sogʻ-salomat yetkazib qoʻyishdi, deyiladi xabarda.
Hodisa oqibatida tan jarohati olganlar yoʻq.
