Oʻzbekiston – Koreya hamkorligini mustahkamlashga qaratilgan hujjatlar toʻplami qabul qilindi

Seul shahrida oʻtkazilgan oliy darajadagi muzokaralar yakunlari boʻyicha Oʻzbekiston Respublikasi Prezidenti Shavkat Mirziyoyev va Koreya Respublikasi Prezidenti Li Chje Myon huzurida ikki tomonlama hujjatlarni almashish marosimi boʻlib oʻtdi.

Toʻplamdan savdo-iqtisodiy, investitsiyaviy, gumanitar va boshqa sohalardagi sheriklikni yanada rivojlantirish va mustahkamlashga qaratilgan shartnoma va bitimlar oʻrin oldi.

Bular ­– transport, aviatsiya, qishloq xoʻjaligi, turizm, sunʼiy intellekt, texnik koʻmak, oliy, maktab va maktabgacha taʼlim, tibbiy mahsulotlarni tartibga solish, atrof-muhitni muhofaza qilish, iqlim oʻzgarishiga qarshi kurashish, intellektual mulkni himoya qilish, arxiv ishi va boshqa sohalardagi hamkorlikka oid hujjatlar.