Ikki viloyatda noqonuniy ravishda "Umra"ga joʻnatmoqchi boʻlganlar ushlandi
Qoʻqon shahrida faoliyat yurituvchi sayyohlik firmasi rahbari fuqarolardan 2200 dollar talab qilgan.
Fargʻona viloyatida noqonuniy ravishda “Umra” ziyoratiga yuborish bilan bogʻliq holat aniqlandi.
Maʼlum boʻlishicha, Qoʻqon shahrida faoliyat yurituvchi sayyohlik firma rahbari 2 nafar fuqaroni “Umra” safariga joʻnatishni vaʼda qilib, 2200 AQSh dollari talab qilgan.
Davlat xavfsizlik xizmati va Ichki ishlar organlari xodimlari hamkorligida oʻtkazilgan tezkor tadbirda u soʻralgan pul mablagʻini olgan vaqtida ashyoviy dalillar bilan ushlandi.
Namangan viloyatida kuzatilgan holatda esa Chortoq tumanida faoliyat yurituvchi sayyohlik firma ishchisi 2 nafar fuqaroni “Umra” safariga yuborish evaziga 2200 AQSh dollari talab qilib, oldindan 400 dollar olgan vaqtida DXX va IIB xodimlari tomonidan ashyoviy dalillar bilan ushlandi.
Hozirda mazkur shaxslarga nisbatan jinoyat ishlari qoʻzgʻatilib, tergov harakatlari olib borilmoqda.
