Oʻzbekiston Birinchi xonimi Serbiya madaniy merosi bilan tanishdi

Oʻzbekiston Birinchi xonimi Serbiyaning madaniy merosi bilan tanishdi.

​Oʻzbekiston Respublikasi Prezidenti Shavkat Mirziyoyevning Serbiya Respublikasiga rasmiy tashrifi doirasida mamlakatimiz Birinchi xonimi Ziroat Mirziyoyeva Serbiya Birinchi xonimi Tamara Vuchich hamrohligida Belgraddagi qator madaniy obʼektlarga tashrif buyurdi.

​Dasturning ilk manzili Serbiya Milliy muzeyi boʻldi. Birinchi xonimlar muzey ekspozitsiyasi bilan tanishib, unda mamlakat tarixiga oid arxeologik topilmalar, shuningdek, serb va jahon sanʼati asarlarini koʻzdan kechirdilar.

Shu bilan birga, oliy martabali mehmonlar "Etno-mreja" anʼanaviy hunarmandchilik koʻrgazmasi bilan ham tanishdilar.

​Mamlakatning eng muhim milliy yodgorliklaridan biri — serb kirill yozuvining eng qadimiy namunasi hisoblangan Miroslav Injiliga alohida eʼtibor qaratildi. XII asrga oid ushbu noyob qoʻlyozma yuksak badiiy qiymatga ega boʻlib, uning miniatyuralari mahorat bilan bezatilgan. 2005 yilda Miroslav Injili YuNESKOning "Jahon xotirasi" xalqaro reyestriga kiritilgan.

​Shundan soʻng Birinchi xonimlar dunyodagi eng yirik pravoslav ibodatxonalaridan biri va Serbiyaning muhim maʼnaviy ramzi boʻlgan avliyo Savva cherkoviga tashrif buyurdilar.

​Samimiy muloqot chogʻida Ziroat Mirziyoyeva va Tamara Vuchich Oʻzbekiston va Serbiya oʻrtasidagi madaniy-gumanitar aloqalarni yanada rivojlantirish muhimligini taʼkidladilar.