Fargʻonada hokim lavozimiga joylashtirish evaziga 210 ming dollar soʻragan shaxs ushlandi
U oʻzini jabrlanuvchiga Oʻzbekiston Respublikasi hakamlik sudi sudyasining yordamchisi deb tanishtirgan.
Fargʻona viloyatida hokim lavozimiga ishga joylashtirib qoʻyishni vaʼda qilgan shaxs ushlandi.
Bosh prokuratura huzuridagi Departamentning Fargʻona viloyati boshqarmasi va boshqa huquqni muhofaza qiluvchi organ xodimlari hamkorligida tezkor tadbir oʻtkazildi.
Unda fuqaro S.A. fuqaro I.D.ning ishonchiga kirib, unga oʻzini Oʻzbekiston Respublikasi hakamlik sudi sudyasining yordamchisi deb tanishtirgan. U goʻyoki yuqori lavozimlarda ishlovchi tanishlari orqali 210 000 AQSh dollari evaziga uni Uchkoʻprik tumani hokimi lavozimiga ishga joylashtirib qoʻyishini aytib, kelishilgan puldan 100 000 AQSh dollarini olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 25, 168-moddasi (firibgarlik) va 28, 211-moddasi (pora berish) bilan jinoyat ishi qoʻzgʻatilib, tergov harakatlari oʻtkazilmoqda.
