Saida Mirziyoyeva Xitoy tashqi ishlar vaziri bilan uchrashdi
Savdo, iqtisodiyot, investitsiya va madaniy aloqalar kabi ustuvor yoʻnalishlardagi munosabatlar rivoji muhokama qilindi.
Prezident Administratsiyasi rahbari Saida Mirziyoyeva Pekinda Xitoy tashqi ishlar vaziri bilan uchrashdi.
Mirziyoyeva Xitoy Kommunistik partiyasi Markaziy Qoʻmitasi Siyosiy byurosi aʼzosi, XKP MQ Tashqi ishlar boʻyicha komissiyasi devoni rahbari, Xitoy tashqi ishlar vaziri Van I bilan uchrashuv samimiy va doʻstona ruhda oʻtganini taʼkidlagan.
Oʻzbekiston va Xitoy oʻrtasidagi strategik sheriklik yangi bosqichga koʻtarilib, keng imkoniyatlar eshiklari ochilmoqda. Shu nuqtai nazardan savdo, iqtisodiyot, investitsiya va madaniy aloqalar kabi ustuvor yoʻnalishlardagi munosabatlar rivojini muhokama qilish alohida ahamiyat kasb etdi.
Suhbat chogʻida global masalalar boʻyicha umumiy qarashlarni shakllantirishga alohida toʻxtalib oʻtilgan.
Saida Mirziyoyeva Van Iga iliq va mazmunli suhbat uchun minnatdorlik bildirdi.
