Shavkat Mirziyoyev Qozogʻiston prezidentiga maktub yoʻlladi

Prezident Shavkat Mirziyoyev Qozogʻiston Respublikasi Prezidenti Qosim-Joʻmart Toʻqayevga maktub yoʻlladi.

Prezident Qozogʻistonning yangilangan parlamenti – Qurultoyga saylovlar xalqaro standartlar va demokratik tamoyillar asosida muvaffaqiyatli oʻtkazilgani bilan samimiy tabrikladi.

​Davlatimiz rahbari ushbu tarixiy voqea Qozogʻiston siyosiy tizimini takomillashtirish, davlat boshqaruvi samaradorligini oshirish va parlament rolini sezilarli darajada kuchaytirishda yangi bosqichni boshlab berganini taʼkidladi.

​Saylovlarda fuqarolarning faol ishtiroki Qosim-Joʻmart Toʻqayev rahbarligida amalga oshirilayotgan, Qozogʻistonning barqaror taraqqiyotini taʼminlash, uning xalqaro maydondagi nufuzi va taʼsirini yanada oshirishga qaratilgan keng koʻlamli konstitutsiyaviy va ijtimoiy-siyosiy islohotlar xalq tomonidan keng qoʻllab-quvvatlanayotganining yorqin tasdigʻi ekani qayd etildi.

​Oʻzbekiston Prezidenti mamlakatimizda koʻp asrlik doʻstlik va yaxshi qoʻshnichilik rishtalari bilan bogʻlangan qardosh qozoq xalqi zaminida bugun amalga oshirilayotgan keng koʻlamli yangilanishlarning yuksak natijalaridan samimiy mamnun ekanini taʼkidladi.

​Shuningdek, Oʻzbekiston va Qozogʻiston parlamentlari oʻrtasidagi yaqin hamkorlik ikki doʻst mamlakat oʻrtasidagi strategik sheriklik va ittifoqchilik munosabatlari ruhida yangi sifat bosqichiga koʻtarilishiga ishonch bildirildi.

​Yakunda Prezident Shavkat Mirziyoyev Qosim-Joʻmart Toʻqayevga mustahkam sogʻliq, farovonlik va davlatchilik faoliyatida katta muvaffaqiyatlar, qardosh Qozogʻiston xalqiga esa tinchlik va ravnaq tiladi.