Oʻzbekiston va Ozarbayjon oʻrtasida qator qoʻshma loyihalarga start berildi
Ular orasida bank sohasidagi hamkorlik, zamonaviy qurilish materiallari ishlab chiqarish, taʼlim muassasalarini tashkil etish, avtomobillarga yoqilgʻi quyish infratuzilmasini barpo etish va boshqalar bor.
Oʻzbekiston Respublikasi Prezidenti Shavkat Mirziyoyev va Ozarbayjon Respublikasi Prezidenti Ilhom Aliyev qoʻshma loyihalarga start berish marosimida ishtirok etdilar.
Soʻnggi yillarda ikki mamlakat oʻrtasidagi strategik sheriklik va ittifoqchilik munosabatlari izchil mustahkamlanib, savdo-iqtisodiy va investitsiyaviy hamkorlik yangi bosqichga koʻtarildi.
Marosim doirasida bank sohasidagi hamkorlik, zamonaviy qurilish materiallari ishlab chiqarish, taʼlim muassasalarini tashkil etish, avtomobillarga yoqilgʻi quyish infratuzilmasini barpo etish, yirik turistik va turar joy majmualarini qurish, mineral xomashyoni qayta ishlash va bogʻdorchilikni rivojlantirishni nazarda tutuvchi qoʻshma loyihalarga start berildi.
Tadbir ishtirokchilari hududlardagi loyiha maydonlaridan onlayn aloqaga chiqib, amalga oshirilayotgan ishlar haqida axborot berdilar.
Yangi qoʻshma loyihalar ikki mamlakat ishbilarmon doiralari oʻrtasidagi kooperatsiyani yanada kengaytirish, oʻzaro investitsiyalar hajmini oshirish, yangi ish oʻrinlari yaratish va iqtisodiy hamkorlikni aniq amaliy mazmun bilan boyitishga xizmat qilishi qayd etildi.
