Toshkent aeroportida Tailanddan olib kelingan sintetik narkotiklar aniqlandi
Amaldagi qonunchilikka muvofiq bunday jinoyatlar sodir etganlik uchun 10 yildan 20 yilgacha ozodlikdan mahrum qilish jazosi belgilangan.
Tailanddan olib kelingan sintetik narkotiklar fosh etildi
DXX tomonidan “Toshkent-Aero” ixtisoslashtirilgan bojxona kompleksi bilan hamkorlikda olib borilgan tezkor-qidiruv tadbirlari natijasida xorijdan olib kelingan giyohvandlik vositalari toʻxtatib qolindi.
Jumladan, “Bangkok – Toshkent” yoʻnalishida uchib kelgan 2004 yilda Jizzax viloyatida tugʻilgan va 1993 yilda poytaxtda tugʻilgan 2 nafar fuqaro Toshkent xalqaro aeroportida tekshiruvdan oʻtkazildi.
Natijada, ularga tegishli yuklar ichida shisha va alyuminiy idishlarga qadoqlab, yashirilgan 4,6 kg “Mefedron” sintetik narkotik moddasi borligi maʼlum boʻldi.
Shuningdek, ularning poytaxtdagi yashash manzili koʻzdan kechirilganda 1,5 litr gashish moyi va 8 litr erituvchi vositalar borligi aniqlanib, tegishli tartibda rasmiylashtirib olindi.
Bundan tashqari, tezkor tadbir davom ettirilib, xorijdan keltirilgan narkotik moddalarni Toshkent shahrida qabul qilib olgan vaqtida 1997 yilda Jizzax viloyatida tugʻilgan shaxs ushlanib, undan ham 635 gr “ALFA-PVP” giyohvandlik vositasi olindi.
Hozirda ushbu narkosavdogarlarga nisbatan Jinoyat Kodeksining 246-moddasi (kontrabanda) 2-qismi bilan jinoyat ishi qoʻzgʻatilib, tergov harakatlari olib borilmoqda.
Taʼkilash lozim, amaldagi qonunchilikka muvofiq bunday jinoyatlar sodir etganlik uchun 10 yildan 20 yilgacha ozodlikdan mahrum qilish jazosi belgilangan.
