Putin ilk bor Kuril orollariga bordi: Yaponiya keskin norozilik bildirdi
Ikkinchi jahon urushidan keyin SSSR Kuril orollarini anneksiya qildi. 1956 yilda Yaponiya bilan tinchlikka yaqinlashtiruvchi deklaratsiya imzolandi, ammo yakuniy kelishuvga erishilmadi.
Kreml matbuot xizmati xabar berishicha, Rossiya prezidenti Vladimir Putin Iturup oroliga tashrif buyurdi. Bu uning Kuril orollariga birinchi tashrifi sanaladi.
Putin Yasniy baliqni qayta ishlash zavodiga, Kuril markaziy tuman shifoxonasiga, Rossiya Qahramoni Ye.D. Norpolov maktabiga tashrif buyurdi va Saxalin viloyati gubernatori Valeriy Limarenko bilan uchrashdi.
Limarenko Putinga aholi bilan uchrashuvlarda, hatto eng chekka hududlarda ham "odamlar: "Hamma narsa gʻalaba uchun" deyishadi", dedi.
"Bizning xalqimiz shunday. Gʻolibning genetik kodi", deb javob berdi Rossiya prezidenti (TASS iqtibos keltirgan).
Kyodo News xabar berishicha, Yaponiya Tashqi ishlar vazirligi Putinning Kuril orollariga tashrifi munosabati bilan "qattiq norozilik" bildirdi.
Bir kun oldin Putin Tinch okeani floti mashqlarida soʻzlagan nutqida Rossiya Kuril orollari masalasida Yaponiyaning sobiq bosh vaziri Sindzo Abe va boshqa yapon rahbarlari bilan konstruktiv munosabatlarga ega boʻlganini, ammo Tokio endi oʻz pozitsiyasini oʻzgartirganini aytdi.
Uning soʻzlariga koʻra, 1950-yillarning oʻrtalarida Yaponiya bilan tinchlik shartnomasi va natijada Kuril orollari masalasini hal qilish yoʻlini ochgan deklaratsiya imzolangan. Biroq, Putin taʼkidlaganidek, Yaponiya oʻshanda deklaratsiyaga rioya qilishdan bosh tortgan, Rossiya esa Yaponiya hukumatiga moslashgan va tinchlik shartnomasiga erishish yoʻllarini izlash uchun muloqotni qayta boshlagan.
"Endi, afsuski, biz pozitsiyada oʻzgarishni koʻrmoqdamiz, bu masala biz tomondan hech qanday tarzda qoʻzgʻatilmagan", dedi Rossiya prezidenti.
Ikkinchi jahon urushidan keyin SSSR Kuril orollarini anneksiya qildi. 1956 yilda Sovet Ittifoqi Yaponiya bilan tinchlik deklaratsiyasini imzoladi va ikki tomon tinchlik shartnomasini tuzgandan soʻng Shikotan va Xabomai orollarini qaytarishga vaʼda berdi.
Keyinchalik, Yaponiya hukumati barcha orollarni qaytarishni talab qila boshladi va shu tariqa tinchlik shartnomasi hech qachon imzolanmadi.
