Namangandagi yashirin omborda katta miqdordagi sifatsiz dorilar topildi
Ushbu dori vositalari qoʻshni respublika hududidan aylanma yoʻllar orqali olib kelingan va kelgusida sotish maqsadida sanitariya qoidalariga zid ravishda saqlangan.
Namanganda 577 mln soʻmlik hujjatsiz va sifati kafolatlanmagan dori vositalari aniqlandi.
Aholi salomatligini muhofaza qilish yoʻnalishida Davlat xavfsizlik xizmati, Iqtisodiy jinoyatlarga qarshi kurashish departamenti va Bojxona qoʻmitasi xodimlari hamkorligida tezkor tadbir oʻtkazildi.
Tadbir davomida Namangan shahridagi uylardan biri xolislar ishtirokida koʻzdan kechirilganda, unda 1996 y.t. fuqaro tomonidan kelgusida sotish maqsadida sanitariya qoidalariga zid ravishda saqlab kelinayotgan dori vositalari borligi aniqlandi.
Xususan, tegishli hujjatlari boʻlmagan hamda sifati kafolatlanmagan 56 turdagi jami 13184 dona dori vositalari, jumladan, “Sefotaksim”, “Bifidumbakterin”, “Atropin”, “Tidomet forte” va boshqa turdagi preparatlar ashyoviy dalil sifatida olindi.
Aniqlanishicha, ushbu “yashirin ombor”da saqlanayotgan dori vositalari qoʻshni respublika hududidan aylanma yoʻllar orqali olib kelingan.
Baholash xulosasiga koʻra, ularning umumiy qiymati 577 mln 381 ming soʻmni tashkil etadi.
Hozirda mazkur shaxsga nisbatan Jinoyat Kodeksining 186-3-moddasi 3-qismi “a” bilan jinoyat ishi qoʻzgʻatilib, tergov harakatlari olib borilmoqda.
